ಒಂದು

 ಗುರಿತೋರಿ ನಡೆಸುವರಿನ್ನೇತರರ ಕಾಣೆನೊ ಹರಿಯೇ.||ಪ||

ಕರುಣಾಕರ ನೀನೊಬ್ಬನೇ ಜಗದಿ ಇರಲಾಗಿ.||ಅ.ಪ||

ನೂರು ವರುಷವ ನೀನಿತ್ತರೆ 

ಯಾರು ಎನ್ನ ಒಯ್ಯಲಾರರೊ

ಮೂರು ದಿನವಿತ್ತಿರಲು ಜಗದಿ

ಸಾರಿ ಉಳಿಸಿದವರನು ತೋರು||ಗುರಿತೋರಿ||

ಅರಸನಾಗುವ ಮನವಿದ್ದಡೆ

ಆರೆನಿತು ನಿಲ್ಲಿಸುವರಯ್ಯ

ಕರದಿ ಕಪ್ಪರವ ಕೊಡಲಾಗಿ

ಮೆರೆಸಿದರಿಲ್ಲ ಧಾರುಣಿಯೊಳು||ಗುರಿತೋರಿ||

ನರನಾಗಿ ಪುಟ್ಟಿರಲು ನಾಮ

ವರವಾಗಿ ಸಿಕ್ಕಿಹುದು ನಿನ್ನ

ಕರುಣಾರಸವನು ಮನದೊಳಗೆ

ಸುರಿಸಯ್ಯ ಶರಣಜನಪಾಲ.||ಗುರಿತೋರಿ||

ಸಾರಿ ಸಾರಿ ಪೇಳುವೆನಯ್ಯ

ನಾರಾಯಣನ ನಾಮಜಪವು

ದುರಿತಭವ ತಾಪತ್ರಯವನು

ಪರಿಹರಿಪುದು  ಅರೆಗಳಿಗೆಯೊಳು||ಗುರಿತೋರಿ||

ಉರಗಶಯನನ ನಂಬಿದರ್ಗೆ

ಉರಿದುಹೋದುದು ಪಾಪಂಗಳು

ಕರೆಕರೆದು ಮುಕ್ತಿ ಕೊಡುವಾತ

ವರದ ಮಾತರೀಶ ವಿಠ್ಠಲ.||ಗುರಿತೋರಿ||