ಇಪ್ಪತ್ತೆರಡು

 

ಹತ್ತು ಜಾತಿಯ ಹೂವ ತನ್ನಿರೆ||ಪ||

ಹತ್ತವತಾರ ತಳೆದು ಮೆರೆದವನ

ನೆತ್ತಿಯ ಮೇಲಿಡಲುತ್ತಮವಾದ ಹೂವ ತನ್ನಿ||ಅ.ಪ||

ಎಲ್ಲ ಭಕ್ತರ ಮನವ ಸಲ್ಲಿಸಿ|

ಬಲ್ಲ ಬಯಕೆಯ ಮೆಲ್ಲನೆಯಿತ್ತ|

ಮಲ್ಲರ ಮಲ್ಲಗೆ ಸಿರಿ ಮಲ್ಲಿಗೆ ಹೂವ ತನ್ನಿ||೧||

ಗುಂಪು ಗೊಲ್ಲರ ಕೂಡಿ ಒಪ್ಪುವ|

ಇಂಪುಗೊಳಲಾ ನುಡಿಸುವವಂಗೆ|

ಕಂಪು ಸೂಸುವ ಕಾಡ ಚಂಪಕ ಹೂವ ತನ್ನಿ||೨||

ಮಾಧವಗೆ ಮಧುಸೂದನಗೆ|

ಸಾಧುಜನರೆದೆಯೊಳು ನೆರೆದವಗೆ|

ಉದಯ ಕಾಲದಿ ಒದಗಿ ಕೇದಗೆ ಹೂವ ತನ್ನಿ||೩||

ಭವಭಯ ಕಳೆವ ದೇವರ ದೇವ|

ತವ ಪಾದಕೆ ಮೋದದಿ ಎರಗುವೆ|

ಸಾವಕಾಶದಿ ಬನ್ನಿ ತಾವರೆ ಹೂವ ತನ್ನಿ||೪||

ಕರವ ಮುಗಿವೆ ಬೆಳಗಾಯಿತೇಳು|

ದರುಶನಗೊಡುವ ಉರಗಶಯನಾ|

ಕರುಣಾಕರನಿಗೆ ಕರವಿರ ಹೂವ ತನ್ನಿ||೫||

ಬೇರೆಂದು ಎಣಿಸದೆ ಪೊರೆಯುವುದು|

ಗಾರುಡಿಗ ಜಗದ ಭಾರಕಳೆವ|

ಉರಗಶಯನನಿಗೆ ಸುರಗಿಯ ಹೂವ ತನ್ನಿ||೬||

ಅಂಜದಲೆ ಭಜಿಸುವಾ ಜನರಿಗೆ|

ನಂಜನು ಮಂಜಿನಂತೆ ಕರಗಿಸಿ|

ಇಂಗಿಸುವ ದೇವನಿಗೆ ರಂಜೆಯ ಹೂವ ತನ್ನಿ||೭||

ತಾಪಸರೆಲ್ಲರು ಕೂಡಿ ಬಂದು|

ಅಪವಾದ ರಹಿತನ ಕೊಂಡಾಡಿ|

ಉಪಾಯದಿಂದಲಿ ಚೆಂಕೇಪಳ ಹೂವ ತನ್ನಿ||೮||

ನರಸಿಂಹನ ರೂಪದಿ ಬಂದಾ|

ಅರವಿಂದನಾಭ ಮುಕುಂದಗೆ|

ಊರಕೇರಿಯೊಳಗಿನ ಗೋರಂಟಿ ಹೂವ ತನ್ನಿ||೯||

ವೀರ ಮಾತರೀಶ ವಿಠಲನಾ|

ಬಾರಿಬಾರಿಗೂ ನಿರತ ನೆನೆದು|

ಸರಿ ದಾರಿಯದೋರಲು ಸಾವಿರ ಹೂವ ತನ್ನಿ||೧೦||