ಎರಡು

 ಕಡೆಗಾಲಕೊಡನಾಡಿಗಳಿಲ್ಲ ಹರಿ ವಾಸುದೇವ||ಪ||

ಬಿಡದೆ ಸಲಹುವ ಒಡೆಯ ನಿನ್ನ ನಾಮವೊಂದಲ್ಲದೆ||ಅ.ಪ||

ಹಡೆದಾಗ ಜನಸೇರಿ

ಸಡಗರ ಮನೆ ತುಂಬಾ

ಗಡಿಬಿಡಿಯೊಳು ಬಂದು

ಬಿಡದೆಯೆತ್ತಿ ಕೊಂಡರಲ್ಲದೆ.||ಕಡೆಗಾಲ||

ಅಂಬೆಗಾಲಿಕ್ಕೆ ಮನ

ದುಂಬಿ ಪಾಡುವರಯ್ಯ

ದಿಂಬು ತೊಟ್ಟಿಲ ತೂಗಿ

ಚಂದಿರನ ತೋರುವರಲ್ಲದೆ||ಕಡೆಗಾಲ||

ನಡೆದಾಡಿ ಬಂದಾಗ

ಪಿಡಿದೆತ್ತಿ ಮುದ್ದಾಡಿ

ಉಡಿಸಿ ಮೃದು ವಸನವ

ಹಿಡಿದು ಕರ ನಡೆಸಿದರಲ್ಲದೆ||ಕಡೆಗಾಲ||

ಜಪವ ಕಲಿಸಲುಯೆಂದು

ಉಪವೀತ ಹಾಕಿದರು

ವಿಪರೀತ ಸಖರೆಲ್ಲ

ಉಪಟಳವತಿ ಕೊಡುವರಲ್ಲದೆ||ಕಡೆಗಾಲ||

ನಡು ಹರೆಯ ಬರುವಾಗ

ಮಡದಿ ಮಕ್ಕಳ ಚಿಂತೆ

ಎಡೆಬಿಡದೆ ದುಡಿ ದುಡಿದು

ಒಡವೆ ವಸನ ಕೊಳುವರಲ್ಲದೆ||ಕಡೆಗಾಲ||

ಒಡಹುಟ್ಟಿದವರೆಲ್ಲ

ಬಡಿದಾಡಿಕೊಳ್ಳುತಲಿ

ಒಡನಿದ್ದ ಬಂಧುಗಳು

ಬಡಪಾಯಿ ಮಾಡಿದರಲ್ಲದೆ||ಕಡೆಗಾಲ||

ಮೋಡ ಮುಸುಕಿನ ಹಾಗೆ

ಕಡೆಗಾಲ ಬಂದಾಗ

ಕೊಡುವಾತ ಮುಕ್ತಿಯನು 

ಒಡೆಯ ಮಾತರೀಶನಲ್ಲದೆ.||ಕಡೆಗಾಲ||