ಮೂವತ್ತಾರು

 

ಅಳಿದು ಹೋಗುವ ಜನ್ಮ|

ಉಳಿಸಿಕೊಂಡವರುಂಟೆ ಜಗದಿ||ಪ||

ಕಳವಳವ ಪಡದೆ ಶ್ರೀ-|

ನಳಿನನಾಭನನು ನೆನೆ ಮನವೆ||ಅ.ಪ||

ಅನಂತ ಜನುಮ ದಾಟಿ|

ಮಾನವ ಜನುಮ ಪಡೆದು|

ಹೀನಗುಣ ತೊರೆದು ಬಲು|

ಮಾನವಂತನ ಭಜಿಸೊ ಮನವೆ||ಅಳಿದು||

ಕೀವು ತುಂಬಿದ ದೇಹ|

ನವಗಂಧವ ಪೂಸಲು|

ಭವ ಭಂಗವು ಹಿಂಗದೊ|

ಸಾವು ಕಟ್ಟಿಹ ಬುತ್ತಿ ಮನವೆ||ಅಳಿದು||

ಒಡೆತನ ಮನೆಯ ಕುಟ್ಟಿ|

ಬಡತನ ತಾ ಬರುವುದು|

ಸಡಗರದಿ ಇರಲಿಕ್ಕೆ|

ಸುಡುಗಾಡು ಕಾಣುವುದು ಮನವೆ||ಅಳಿದು||

ಸತಿಸುತರ ಮೋಹದಿ|

ಅತಿ ಭಂಗ ಪಡುತಿರಲು|

ಗತಿಯದೋರುವ ನಮ್ಮ|

ಮಾತರೀಶ ವಿಠಲನು ಮನವೆ||ಅಳಿದು||