ಹನ್ನೊಂದು

 

ಎಲ್ಲವ ಬಿಟ್ಟು ರಾಯನ ಪದವಿ ಪಡೆದ ಕಾಣೆ|

ಕಲ್ಲನು ಮೆಟ್ಟಿ ಮುಕ್ತಿಯ ಕೊಟ್ಟ ರಾಮನಾಣೆ||ಪ||

ಬಲ್ಲಿದರೊಳಗೆ ಬಲ್ಲಿದನಾತ|

ಎಲ್ಲರ ಕಷ್ಟ ಕಳೆಯುವನಾತ|

ಮುಳ್ಳಿನ ಹಾದಿ ತುಳಿದರನೆತ್ತಿ|

ಹುಲ್ಲಿನ ಹಾಸ ಕೊಡುವ ಗುರುರಾಯ ತಾನೆ||ಎಲ್ಲವ||

ತುಂಗೆಯ ತಟದಿ ನಿಂತಿರುವಾತ|

ಭಂಗವ ಕಳೆದು ಪೊರೆಯುವನೀತ|

ಅಂಗಕೆ ಕಾವಿ ಧರಿಸಿರುವಾತ|

ರಂಗನ ಪಾದ ತೋರ್ವ ಯತಿರಾಯ ತಾನೆ||ಎಲ್ಲವ||

ಗೋಪಿಯ ಬೊಟ್ಟನಿಟ್ಟಿರುವಾತ|

ಪಾಪದ ಬೆಟ್ಟ ಮೆಟ್ಟಿದನೀತ|

ಕೋಪವ ಕುಟ್ಟಿ ಅಟ್ಟುವನಾತ|

ಈಪರಿಯಿಂದ ಪೊರೆವ ಭವಬಂಧು ತಾನೆ||ಎಲ್ಲವ||

ಅತೀತ ಕರ್ಮ ಮಾಡಿದವರಿಗೆ|

ಮತಿಯನ್ನಿತ್ತು ಶಾಶ್ವತ ವಾದ|

ಗತಿಯಂಗೊಡುವೆ ಎನ್ನುತಲಿರ್ದ|

ಮಾತರೀಶ ವಿಠಲನ ನಿಜದಾಸ ತಾನೆ||ಎಲ್ಲವ||