ಹದಿನಾರು

 

ಒಂದನೊಂದು ಕಾಲದಲ್ಲಿ|

ಇಂಧುಧರನ ಸೇವೆ ಮಾಡಿ|

ಅಂದದಲ್ಲಿ ಇರ್ದನೊಬ್ಬ ವಿಪ್ರ ಕಾಣಿರೊ||

ಹುಲ್ಲು ಮನೆಯ ಮಾಡಿನೊಳಗೆ|

ಕಲ್ಲು ದಿಂಬು ನೆಲದ ಹಾಸು|

ಮೆಲಲಿಕಿಲ್ಲ ಒಂದು ಬೊಗಸೆ ಬಡವ ಕಾಣಿರೊ||

ರಾಗಿಅಕ್ಕಿ ದವಸವಿರದೆ|

ಬಾಗಿಕೂಗಿ ಅಳುತರಿಹರು|

ಸಾಗಿ ಪೋಗಿ ಭವದಿ ದುರಿತ ಅಧಿಕವಾಹುದು||

ಮಾಗಿ ಹೋದ ಕೇಶರಾಶಿ|

ಬಾಗಿ ಹೋದ ಬೆನ್ನು ಮೂಳೆ|

ಭೋಗಿಭೂಷಿ ಹರನ ನೆನೆವ ವಿಪ್ರೋತ್ತಮ||

ಬಡವನಾಗಿ ಇರಲು ಕೂಡ|

ಎಡೆಯಬಿಡದೆ ಶಿವನ ಪೂಜೆ|

ಮಡದಿಮಕ್ಕಳೊಡನೆ ಸೇರಿ ಮಾಡುತಿರ್ದನು||

ಬಡವು ಇರದೆ ಒಡಲು ಕರಗಿ|

ನಡುವು ಬಾಗಿ ಇರಲು ಕೂಡ|

ಒಡೆಯ ಶಿವನ ಪೂಜೆ ಮಾಡ್ವ ಮಡದಿಯೊಂದಿಗೆ.||

ಇಕ್ಕೆಲದಿ ಮಕ್ಕಳೆರಡು|

ತಕ್ಕುದಾದ ಮಡದಿ ಜೊತೆಗೆ|

ಮುಕ್ಕಣನಾ ಭಜನೆ ಸದಾ ಅಂತಃಕರಣದಿ||

ಅಶನವಿರದೆ ಅಳುತಲಿರುವ|

ಕೃಶಂಬಟ್ಟ  ಮಕ್ಕಳನ್ನು|

ಈಶ ಪೊರೆಯಬೇಕೆಂದು ಮೊರೆಯನಿಡುವನು||

ಶಿವನ ರಾತ್ರಿಬರಲು ಅಂದು|

ಅವನ ಪೂಜೆ ಮಾಡಲಿಕ್ಕೆ|

ಭವನದೊಳಗೆಯೇನು ಇಲ್ಲ ಎಂದಳಂಗನೆ||

ಮಡದಿಯಂದ ನುಡಿಯ ಕೇಳಿ|

ಒಡನೆ ಬರುವೆ ಫಲವಗೊಂಡು|

ಕಾಡನರಸಿ ಫಲ ಪುಷ್ಪ ತರುವೆಯೆಂದನ||

ಕಾಡ ದಾರಿ ಪಿಡಿದುಕೊಂಡು|

ನಡೆಯುತಿರಲು ತುರದಿ ವಿಪ್ರ|

ಬೇಡರೂಪಿನವನು ಒಬ್ಬ ನೋಡುತಿರ್ದನು||

ಕಾಡ ನಡುವೆ ಗುಡಿಯ ಕಟ್ಟಿ|

ಜೋಡಿ ನಂದಿ ಗಾಡಿ ಏರಿ |

ಮೋಡಿ ಮಾಡಿ ಅವನ ನೋಡಿ ಕಾಡುತಿರುವನೆ||

ಕರದಿ ಕಪ್ಪ ಶೂಲ ಹಿಡಿದು|

ವರೆಸಿ ಭೂದಿ ಹಣೆಯ ಮೇಲೆ|

ಕರಿಯ ಉಡುಗೆ ಧರಿಸಿ ಸಾಗಿ ಬರುತಲಿರುವನು||

ಉರಿಯ ಗೆಂಡ ನೋಳ್ಪ ತೆರದ|

ಮೂರು ಕಣ್ಣು ಇಹುದು ಅವಗೆ|

ಕೊರಳ ಸುತ್ತ ಉರಗ ಮಾಲೆ ಇರಿಸಿಕೊಂಡಿಹ||

ಖಂಡ ತುಂಡ ಮೈಯದೋರಿ|

ದಂಡ ಶೂಲ ಪಿಡಿದು ನಡೆವ|

ಗಂಡುಗಲಿಯ ನಿಲುವು  ಕಂಡು ಬೆರಗುಗೊಂಡನೆ||

ಹಿಂದೆ ಎಲ್ಲೊ ನೋಡಿದಂತೆ|

ಅಂದು ಅವಗೆ ಭಾಸವಾಗಿ|

ಮಂದಮತಿಯು ತಾನು ನಿಂದ ಅಂದದಿಂದಲಿ||

ವೀರ ಕೋಟಿ ತೇಜ ರವಿಯು|

ಭರದಿ ಹೊಳೆವ ತೆರದಿ ತಾನು|

ಧರಣಿ ಯಲ್ಲಿ  ಹೊಳೆದು ತನ್ನ ನೆರಳಗಾಣದೆ.||

ಇಂತು ಇರುವ ರೂಪಿನವನು|

ಅಂತು ಬಂದು ಎದುರು ನಿಂತು|

ಸಂತರಂತೆ ನೋಡುತಿರುವ ದಂತದೋರುತ||

ಮುತ್ತಿ ನಂಥ ದಂತ ಪಂಕ್ತಿ|

ಇತ್ತು ಗಲ್ಲದೊಳಗೆ ಕುಳಿಯು|

ಗತ್ತಿನಿಂದ  ಮುಗುಳನೀವ  ಜ-ಗತ್ತಿನೊಡೆಯನು.||

ಜಡೆಯ ಕಟ್ಟಿ ನೀರ ಬಸಿದು|

ಕಡೆಯ ದಿಕ್ಕಿನೊಡೆಯ ಶಿವನು|

ಒಡನೆ ಕಂಡು ಪಾಮರವನ ನೋಡುತಿದ್ದನು.||

ಕರವು ಬಾಯಿ ಕಟ್ಟಿ ಹೋಗಿ|

ಮರಕೆ ಆನು ಕೊಟ್ಟು ಒರಗಿ|

ಪರಿಯ ಕಂಡು ಕರವ ಮುಗಿಯುತಿರ್ದನೆ||

ಗಾಡಿಯಿಂದ ಕೆಳಗೆ ಇಳಿದು|

ಓಡಿ ಬಂದು ನೋಡಿ ನಿಂತು|

ತೀಡಿ ತಲೆಯ ನೇವರಿಸಿದ ಗಾಡಿಕಾರನು||

ಉಭಯ ಕುಶಲ ಮಾತನಾಡಿ|

ಅಭಯ ಹಸ್ತ ತಲೆಯೊಳಿಟ್ಟು|

ರಭಸದಿಂದ ಬಂದ ವಿಷಯ ಕೇಳುತಿರುವನು||

ಅಯ್ಯ ಇಂದು ಶಿವನ‌ರಾತ್ರಿ|

ಪಯಣ ಮಾಡಿ ವನಕೆ ಬಂದೆ|

ಜೀಯ ಶಿವನ ಪೂಜೆಗಾಗಿ ಹೂವ ಕೊಯ್ಯಲು||

ಒಡನೆ ನಿನ್ನ ಯಾರು ಇಲ್ಲ|

ಕುಡಿಗೆ ಕಡೆಗೆ ದೇವ ಬಲ್ಲ |

ಬಡಿಗೆ ಹಿಡಿದು ನಡೆವ ಗೊಡವೆ ನಿನ್ನದಲ್ಲವೆ||

ತನಗೆ ದೇವ ಶಿವನ ದಯದಿ |

ಮನದ ಒಡತಿ ಜೊತೆಯೊಳಿಹಳು|

ಮನೆಗೆ ಮಕ್ಕಳೆರಡು ಇಹರು ಚಂದದಲ್ಲಿಯೆ||

ಮಡದಿ ಮಕ್ಕಳೆಲ್ಲ ಅಲ್ಲಿ|

ಬಿಡದೆಯೆ  ನಿತ್ಯೋಪವಾಸ|

ಮಾಡುತಿಹರು ಶಿವನ ನೆನೆದು ಮನಸಿನಲ್ಲಿಯೆ||

ಹೂವ ಕೊಯ್ಯಲೇಕೆ ನೀನು|

ಬವಣೆ ಪಟ್ಟು ವನಕೆ ಬಂದೆ|

ಅವನಿಯೊಳಗೆ ಕುಸುಮಕೆಲ್ಲ ರೋಗಬಂದಿತೆ?

ನಮ್ಮ ಪಾಡು ನಮಗೆ ಗೊತ್ತು|

ತಮ್ಮ ನುಡಿಯೊಳೇಕೆ ಕುಹಕ|

ಸುಮ್ಮನಿರಲು ನಾನು ಅತಿ ಕು-ಚೋದ್ಯವಾಯಿತೆ?|

ಹೋಕ ತಪ್ಪು ತಿಳಿಯ ಬೇಡ|

ತೂಕಕಿರದ ನುಡಿಯು ಬೇಡ|

ಬಾಕಿಗೆಲಸ ಹಲವು ಇಹುದು ದಾರಿ ಬಿಡಲೆನೆ||

ತಾಪ ಕೋಪ ಮಾಡಬೇಡಿ|

ಕಪಟ ಮಾಡ್ವ ಬಯಕೆಯಿಲ್ಲ|

ಪಾಪ ಕಂಡು ಕರುಣೆದೋರಿ ಕೇಳ್ದುದೆಂದೆನೆ||

ಉಡಲು ಎರಡು ಬಟ್ಟೆಯಿಲ್ಲ|

ಒಡಲು ತುಂಬ ಊಟವಿಲ್ಲ|

ಕಾಡ ಅರಸಿ ಬಂದರಷ್ಟೆ ದಿನವು ಪೋಪುದು||

ನಿತ್ಯ ಭಜನೆ ಮಾಡಲೇಕೆ|

ಹತ್ತು ಭವಣೆ ತಪ್ಪಲಿಲ್ಲ|

ಮತ್ತೆ ಹರನ ಚರಣ ಸೇವೆ ಮಾಡುವೇತಕೆ?

ಕಾಯ ಶುದ್ದಿಗಾಗಿ ಸ್ನಾನ|

ಮಾಯ ಕಳೆಯೆ ಶಿವನ ಧ್ಯಾನ|

ದಯದಿ ದೊರಕಿಹುದೈ ಎನಗೆ ಜೀವಸಾಧನ||

ಶಿವನ ಬಗೆಗೆ ನುಡಿಯ ಬೇಡ|

ನೆವನ ಪಿಡಿದು ಜರೆಯ ಬೇಡ|

ಅವನ ತೆರನೊಳಿರುವರಾರ ನೋಡಲಾರೆಯೆ||

ಎನ್ನ ಕರ್ಮ ಅಧಿಕ ವಿರಲು|

ಮುನ್ನ ಕವಿದ ಮೋಡದಂತೆ|

ಪನ್ನಗಧರನ ನಾನೆಂತು ದೂಷಿಪುದಯ್ಯ||

ನಾಮ ಬಲದಿ ಇಂದು ಅವನ|

ಯಾಮ ಗಳಿಗೆ ಸಾಗಿ ಪೋಗಿ|

ಕಾಮವೆಲ್ಲ ಸಲುತಲಿಹುದು ಸಮಯದಲ್ಲಿಯೆ||

ಮರೆಯಲಿಕ್ಕೆ ನೀನು ಹರನ|

ಸಿರಿಯ ಬೊಗಸೆದುಂಬ ಕೊಡುವೆ|

ಅರಸಿಯೊಡನೆ ಬಾಳಲುಂಟು ಸರಸದಿಂದಲಿ||

ಹರನ ರೂಪ ಧರಿಸಿ ಇಲ್ಲಿ|

ಮರುಳು ಮಾಡ್ವ ಕಾರ್ಯ ತೊರೆಯೆ|

ಕರುಣೆಯಿಹುದು ನಿನ್ನ ಮೇಲೆ ಪೋಗುಪೋಗೆಲೆ||

ಬಯಲ ಡಂಭದೋರ ಬೇಡ|

ಕಾಯ ರೂಪ ನಿಜವು ಅಲ್ಲ|

ಮಾಯ ರೂಪ ಹಾಕಿದೊಡನೆ ಶಿವನಾಗೆಯೋ||

ಮಸಣ ಕಾದು ಭಿಕ್ಷೆ ಬೇಡ್ವ|

ಅಸುವ ಹರಣಗೊಂಬ ಕಾರ್ಯ|

ಅಸಿತ ನಾತವಿರುವ ಉಡುಗೆ ಗಜದಜರ್ಮವು|| 

ಕಸದ ಮೇಲೆ ಕುಳಿತುಕೊಂಡು|

ಮಸಿಯ ಮೈಗೆ ಬಳಿದುಕೊಂಡು|

ನಸುಕಿನಲ್ಲಿ ಹೊರಟುಬಿಡುವ ಮಸಣಕೊಡೆಯನು||

ನಂಬಿನೆಚ್ಚಿ ಇರಲುಬಹುದು|

ಇಂಬುಕೊಡುವ ಕಾಮಧೇನು|

ಅಂಬಿಕಾ ಪತಿಯು ಶಿವನು ಕಂಬುಕಂದರ.||

ಹತ್ತು ಮಾತು ಬೇಡವಿಲ್ಲಿ|

ಚಿತ್ತದಲ್ಲಿ ಬುದ್ಧಿ ಕೊಡುವ|

ಕತೃ ಶಿವನು ಬೇರೆ ದೈವವಿಲ್ಲವೆಂದೆನೆ||

ಅನ್ಯ ಮಾತು ಹೇಳತೀರ|

ಬೆನ್ನದೋರಿ ಪೋಗು ಇನ್ನು|

ಎನ್ನ ದೈವ ಎನಗೆ ಮೇಲು ಪೋಗುಪೋಗೆನೆ||

ಎನ್ನಲಾತ ಅವುಡುಗಚ್ಚಿ|

ಮುನ್ನ ಬೇಡ ರೂಪಿನವನು|

ನಿನ್ನ ಭಕ್ತಿಗೆನ್ನ ನಮನ ಎಲೋ ಹಾರುವ||

ಬೇಡ ತನ್ನ ಚೀಲದಿಂದ|

ಅಡಗಿಸಿಟ್ಟ ಮುಷ್ಟಿ ಅಕ್ಕಿ|

ಒಡನೆ ತೆಗೆದು ಕರದಿ ಕೊಟ್ಟ ತಾನುಕೂಡಲೆ||

ಒಲ್ಲೆ ಇಲ್ಲ ಎನ್ನ ಬೇಡ|

ಕಲ್ಲ ಲಿಂಗ ಪೂಜೆಗೆಂದು|

ಸಲ್ಲಿಸುವುದು ಇದನು ನಾನು ಎಲೋ ಹಾರುವ||

ಶಾಕ-ಪಾಕ ಮಾಡಿ ಇದನು|

ಇಕ್ಕಿ ಶಿವಗೆ ಉಣಲು ಎಂದು|

ಕಕ್ಕೆಯಿಂದ ಬೇಡ ನುಡಿದ ಬೆಡಗಿನಿಂದಲಿ||

ಇಷ್ಟು ವರೆಗೆ ದೂರುತಿದ್ದು|

ಕಷ್ಟವಿಷ್ಟು ಬಿಡುವೆ ಯಾಕೆ| 

ಮುಷ್ಟಿ ಅಕ್ಕಿ ಕೊಟ್ಟು ಈಗ ಹೇಳಬೇಕೆಲೆ||

ರೇಗಬೇಕು ನಿನ್ನನೆಂದು|

ರಾಗವೆಳೆದು ನುಡಿದುದಯ್ಯ|

ಬೇಗಪೋಗಿ ಗೈಯಬೇಕು ಪೂಜೆಯೆಂದೆನೆ||

ಅಸಮ ದೈವ ಹರನ ಪೂಜೆ|

ಭಸ್ಮ ಗಂಧ ಕಾಯಿ ಹಣ್ಣು|

ಎಸಳು ಬಿಲ್ವ ತಂದುಗೊಡುವೆ ನಾಳೆಯಿಲ್ಲಿಗೆ||

ನಾನುಯಿತ್ತ ಅಕ್ಕಿಯಲ್ಲಿ|

ಒನ್ದು ಅಗಳು ಉಳಿಸಿ ಮಾತ್ರ|

ಎನ್ನ ಕಾಣಬೇಕು ನಾಳೆ ನಿನುಂಮಿಲ್ಲಿಯೆ|

ಸರಿಯೆ ಎನುತ ಬಂದ ಕಾರ್ಯ|

ಪರಿಯು ಮುಗಿದು ಮುನ್ನ ಪೋಗಿ|

ಹರನ ಪೂಜೆ ಮಾಡಲುಂಟು ಪೋಗಿಬರುವೆನೆ||

ಶಿವನ ಕರುಣೆಯಿಂದ ಒಬ್ಬ|

ಧವಸ ಅಕ್ಕಿ ಯನ್ನು ಕೊಟ್ಟ|

ದಿವಸ ಭಾಗ್ಯ ರೂಪಿನಿಂದ ಬಂದಿತಿಂದೆನೆ||

ಅನ್ನವನ್ನು ನೋಡದೆಷ್ಟು|

ನಿನ್ನೆ ಮೊನ್ನೆಯಾಯಿತೆಂದು|

ನಯನದೊಳಗೆ ಜಲವದುಂಬಿ ಮಡದಿಯೆಂದಳು||

ಶಾಕಪಾಕವನ್ನು ಮಾಡಿ|

ಸಾಕುಟುಂಬ ಸೇರಿ ವಿಪ್ರ|

ಶಕಟಾರಿ ಪಿತವೈರಿ ಪೂಜೆಮಾಡಿದ||

ಮಣೆಯನಿಟ್ಟು ಮಡದಿಯಾಕೆ|

ಉಣಲುಬನ್ನಿ ಕಾಂತನೆಂದು|

ಚಿಣ್ಣರನ್ನು ಕೂಡಿಕೊಂಡು ಬಡಿಸುತಿರ್ದಳು||

ಮದನಮುಖಿಯೆ ಒಂದುಅಗುಳು|

ವ್ಯಾಧಗೆಂದು ಉಳಿಸಬೇಕು|

ಉದಯದೊಳಗೆ ಪೋಗಿ ಅವಗೆ ಈಯಬೇಕೆನೆ||

ವದನದೊಳಗೆ ಮುಗುಳುನಗುತ|

ಮೋದದಿಂದ ಉಣ್ಣಲಿಕ್ಕಿ|

ಉದರಪೂರ್ತಿ ಬಡಿಸಿದಳಾ ವಿಪ್ರನಾಂಗನೆ||

ಉಂಡಮೇಲೂ ನಾಕುಮಂದಿ|

ಹಂಡೆಪೂರ್ತಿ ಇಹುದುಅನ್ನ|

ಮಂಡೆಬಿಸಿಯ ಮಾಡಿಕೊಂಡ ವಿಪ್ರೋತ್ತಮ||

ಅಕ್ಕಪಕ್ಕ ವಾರ್ತೆ ಕರೆದು|

ಇಕ್ಕಿ ಬಡವು ಎಲ್ಲರಿಗೂ|

ಉಕ್ಕಿ ಅನ್ನ ಏರುತಿತ್ತು ಆಕೂಡಲೇ||

ಊರಜನರಿಗೆಲ್ಲ ವಿಪ್ರ|

ಒರೆದು ಉಂಡು ಪೋಗಿರೆಂದ|

ಭರದಿ ಜನರು ನೆರೆದರಲ್ಲಿ ಕರೆದಗೂಡಲೆ||

ಸಪರಿವಾರ ಸೇರಿ ಬಡಿಸಿ|

ಸಫಲನಾಗದಲೇ ಪೋದ|

ತಪಲೆಯೊಳೊಂದಗುಳ ತಾನುಳಿಸಲಾರದೆ||

ಕಾಯವಿದ್ದರೇನು ಫಲಾ|

ಬಾಯಿಮಾತು ತಪ್ಪಿತಲ್ಲ|

ಭಯದಿ ಒದರಿಕೊಂಡ ವಿಪ್ರ ಆದಾಗಲೇ||

ಮೋಡಿಗಾರ ಬೇಡನಲ್ಲ|

ಮಾಡಿ ಮಾಯ ಮಾಟವನ್ನು|

ಓಡಿಪೋಗಿ ಕೇಳಿಬರುವೆ ವನದವಾಸಿಯ||

ಸಾವಿರಾರು ಮಂದಿಯುಂಡು|

ಅವನಿಯೊಳಗೆ ಇಂಥ ಊಟ|

ಈವರೆಗೂ ಮಾಡಲಿಲ್ಲ ಎನುತಲಿದ್ದರು||

ಹರನಸಾಸ ಪಟ್ಟರೂನು|

ಉರುಕುತಿತ್ತು ತಪಲೆಯೊಳಗೆ|

ಬರಿದು ಆಗಲಿಲ್ಲ ಮಹಾನ್ನಪ್ರಸಾದವು||

ಚಿಂತಕ್ರಾಂತನಾಗಿ ವಿಪ್ರ|

ಅಂತು ಮಾತುತಪ್ಪಿತೆಂದು|

ಭ್ರಾಂತುಗೊಂಡು ಪರಿಯತಾಪ ಪಟ್ಟುಕೊಂಡನು||

ಇಂದು ನಮಗೆ ಬಂದ ಭಾಗ್ಯ |

ಎಂದುಕೊಂಡು ವಿಪ್ರಸತಿಯು|

ತೊಂದರೆಯು ನೀಗಿತೆಂದು ಅತಿ ಮೋದಗೊಂಡಳು||

ಅಂದು ಅಕ್ಕಿಕೊಟ್ಟವಾತ|

ಸಂದೆಗವಿನಿತು ಬೇಡವೈ|

ನಂದಿಏರಿಬಂದವನು ಸಿರಿ ಹರನಾಗಿಹ|| 

ಆದರಿಂದ ತಾವು ಬಂದು|

ಮದನವೈರಿ ಹರನ ನೆನೆದು|

ಮುದ್ದೆಯನ್ನ ಕಟ್ಟಿಕೊಂಡು ಹೊರಡುವೆಂದಳು||

ಮಡದಿ ನುಡಿಯ ಕೇಳಿ ವಿಪ್ರ|

ಕೂಡಿ ಕೊಂಡು ಮಡದಿಯನ್ನು|

ಕೂಡಲೆಯೇ ಹೊರಟುಬಿಟ್ಟ ಕಾಡಿನಂಚಿಗೆ||

ಬೇಡನಿದ್ದ ಜಾಗದಲ್ಲಿ|

ಗುಡಿಯಕಂಡು ಬೆರಗುಗೊಂಡು|

ಒಡೆಯ ಹರನ ಲಿಂಗವಲ್ಲಿ ಮೂಡಿಕೊಂಡಿತು||

ಕಡೆಯದಿಕ್ಕಿನೊಡೆಯ ಹರನು|

ಬೇಡರೂಪಿನಿಂದ ಬಂದು|

ಕಾಡಿನೊಳಗೆ ತನ್ನ ಗುಡಿಯ ಮಾಡಿಕೊಂಡನು||

ಮಾತನುಳಿಸು ಮಹಾದೇವ|

ನುತಿಸಿ ಗಂಟು ಬಿಚ್ಚಿ ನೋಡೆ|

ಮಾತಿನಂತೆ ಅಗುಳು ಅನ್ನ ಮಾತ್ರವಿದ್ದಿತು.||

ನನ್ನದೇನು ಇಲ್ಲವಿಲ್ಲಿ|

ಮುನ್ನ ನೀನು ಕೊಟ್ಟ ಕಾಯ|

ಎನ್ನ ಮಾತನುಳಿಸಿಬಿಟ್ಟೆ ಕರುಣಮೂರುತಿ.||

ಹರನ ದಯದಿ ಮರಳಿ ಮನೆಗೆ|

ಕರವ ಮುಗಿದು ಹರನ ಪದಕೆ|

ನೂರು ವರ್ಷ ಬಾಳಿದನಾ ಹರುಷದಿಂದಲಿ||

ಸೋಮವಾರ ಪಠಣ ಮಾಡೆ|

ಕಾಮವೈರಿ ಸತತ ಪೊರೆವ|

ಅಮಿತ ಕಾಮಸಲಿಸಿ ಸುಸಂತಾನ ನೀಡುವ||

ಬರೆದು ಓದಿ ಕೇಳಿದರಿಗೆ|

ಹರನ ಪದವಿ ಲಭ್ಯ ವಹುದು|

ಕರೆದು ಮುಕ್ತಿ ಕೊಡುವ ಮಾತರೀಶ ವಿಠಲನು.||