ಹತ್ತೊಂಬತ್ತು

 

ಮರುಳಾದೆ ನಾನು ಮರುಳಾದೆ ಸರಸಿಜನಾಭ|

ಎರವಿನ ಸಂಸಾರ ಸರಳ ಎಂದು ತಿಳಿದು ||ಪ||

ಇರುಳಿಗೆ ಕಂಡ ಬಾವಿಗೆ ನಾನು ಉರುಳಿ ಬಿದ್ದೆ|

ಕರುಳುದೊಗಲ ಜೀವ ಗೂಡಿದು ಮಾಂಸದ| ಮುದ್ದೆ ||ಅ.ಪ||

ಹೊಲಸು ಬಾಗಿಲೊಳು ಬಂದೆ,|

ಕಲಸಿ ಮಲಮೂತ್ರ ತಿಂದೆ|

ಮೊಲೆಗುಡಿದು ನಾನು ಸೊಕ್ಕಿ,|

ಪಾಪದ ಕೂಳ ಸರಿ ಮುಕ್ಕಿ||ಮರುಳಾದೆ||

ಮಂಗಳವಾಗಿಹುದೆನ್ನುತ|

ಹಂಗಿನನ್ನ ಸರಿಯುಂಡು|

ತಂಗಳು ಜೀವ ಮಾಡಿಟ್ಟು|

ಕೊಂಗತನದಲಿ ಸುರೆಗೊಂಡು||ಮರುಳಾದೆ||

ಮೋಹದ ಹೊದಿಕೆಯನು ಹೊದ್ದು|

ವಿಹರಿಸಿ ಸಂಸಾರ ವನದೊಳು|

ಬಹುವಿಧದಿ ಜೀವನ ನಡೆಸಿ|

ಕಹಿಯೇರಿ ಮೋಹಪಾಷವು||ಮರುಳಾದೆ||

ಪೊರೆಗಳಚಿ ದಾಟಿಸೀ ಭವ|

ಶರಧಿಯ ನೀರೊಳು ತೇಲಿಸಿ|

ಕರೆಯನು ಮುಟ್ಟಿಸಿ ಪಾಲಿಪ|

ಗುರು ಮಾತರೀಶನ ಕಂಡು||ಮರುಳಾದೆ||