ಐವತ್ತು

 

ಯಾರಿವನೆಂದು ಪೇಳಿ ಒಗಟೊಂದ ಕೇಳುವೆನು|

ಸರಿಯುತ್ತರವ ನೀಡುವುದು ಬಲ್ಲವರೆಲ್ಲರು||ಪ||

ಗೊಲ್ಲ ಕುಲದೊಳು ಪುಟ್ಟಿದನಂತ

ಬಾಲ ಲೀಲೆಯ ತೋರಿದನಂತೆ|

ಒಳ್ಳೆ ಬೆಣ್ಣೆಯ ಮೆದ್ದಿಹನಂತೆ|

ಮಲ್ಲ ಖಳರನು ಕೊಂದಿಹನಂತೆ|

ಎಲ್ಲ ಭಕುತರ ಪೊರೆಯುವನಂತೆ||ಯಾರಿವ||

ನವಿಲುಗರಿಯನ್ನಿಟ್ಟ ಮುಕುಟನ|

ಹಾವಿನ ತಲೆಯ ಮೆಟ್ಟಿದಾತನ|

ಭುವನವೀರೇಳು ಕಾಯ್ದಾತನ|

ಮಾವನೆಂಬನ ಮುಕ್ಕಿ ಬಿಸುಟನ|

ಮಾನಿನಿಯರ ತಾ ಸಲಹಿದವನ||ಯಾರಿವ||

ಮಾಯ ರಕ್ಕಸಿಯ ಮೊಲೆಯಗುಡಿದು|

ತಾಯಿಗೆ ಬಾಯಲಿ ಜಗವದೋರಿ|

ಮಾಯ ಕುವಾದಿಗಳ ಸೋಲಿಸಿದ|

ರಾಯ ಮಧ್ವಗೊಲಿದು ಬಂದ ಭವ|

ಭಯ ನಾಶಿ ಮಾತರೀಶ ವಿಠಲ||ಯಾರಿವ||