ಎಪ್ಪತ್ತ ಮೂರು
ಸುಖವಾಗಿಹೆನೆಂದರೆ ಏತರದ ಸುಖವೊ?
ಬಕುಳಾ ತನಯ ನಿನ್ನನು ನೋಡದ ಸುಖವು||
ಸುಖವಲ್ಲವೆನಗೆ ಎನ್ನಯ್ಯ ತಿಮ್ಮಯ್ಯ||
ಸಾಕೆನಗೀ ಭವದೊಲವು ಪರಗತಿಯೆಂಬೊ||
ಸುಖವೆನಗೆ ನೀಡಿ ಸಲಹಯ್ಯ ಎನ್ನೊಡೊಯ||
ಸಖ ಮಾತರೀಶ ವಿಠಲ ದೇವರ ದೇವ||
ಅರುವತ್ತಾರು
ನೀರ ತರಲು ಪೋಗೋಣ ಬಾರೆ| ತ್ವರದಲಿ ಒದಗು ನೀರಜ ನಯನೆ||ಪ|| ಪೋರನು ಎದ್ದರೆ ದಾರಿಯು ತೋಚದು| ಕರಕರೆ ಮಾಡುವ ರಚ್ಚೆಯ ಹಿಡಿಯುತ||ಅ.ಪ|| ಅಟ್ಟಾಡಿ ಆವಿ|ನೊಟ್ಟಿಗೆ ಪೋಗುವ| ಪಟ್ಟನು ಬಿಡದಲೆ|ಚಿಟ್ಟೆಯ ಹಿಡಿಯುವ| ಮುಟ್ಟಿ ಫಣಿಹೆಡೆಗೆ| ಕುಟ್ಟುತ ಕುಣಿಯುವ| ಅಟ್ಟುತ ಅಣ್ಣಗೆ| ಪೆಟ್ಟನು ಕೊಡುವನೆ||ನೀರ|| ಸದ್ದನು ಮಾಡದೆ|ಹದ್ದನು ಏರುವ| ಬುದ್ದಿಯು ಇಲ್ಲದೆ|ಕದ್ದನೆ ಬೆಣ್ಣೆಯ| ಬಿದ್ದು ತಾನೆದ್ದು|ಗುದ್ದುವ ಮಲ್ಲರ| ಎದ್ದರೆ ಅಳುವನಿ|ಮುದ್ದು ಶ್ರೀಕೃಷ್ಣ||ನೀರ|| ನಾರಿಯರೆಲ್ಲರ|ಸೀರೆಯ ಕದಿಯುವ| ಚೋರನವನು ನರ|ಹರಿ ನಾರಾಯಣ| ಸಿರಿ ಮಾತರೀಶ|ವರ ವಿಠಲರಾಯ| ನಿರತದಿಂದ ಭಕು|ತರ ಪೊರೆಯುತಿರುವ||ನೀರ||
ಕಾಮೆಂಟ್‌ಗಳು
ಕಾಮೆಂಟ್‌ ಪೋಸ್ಟ್‌ ಮಾಡಿ